ye kahani hai ek phool ki. ek phool jo jab khila tha, to sab uske diwane ho gaye the. jaise ki sara sansar khilkhila utha ho. uska chehra jo bhi dekh leta, wo parmatm prapt kar leta. aisi shanti, aisa chaitanya, jo har kisi ko behla de. andhere me,jab use koi dekh na paye, us waqt bhi wo apni khushboo se poora vatavaran pavitra banata rehta. kitne hi bhavre, kitni hi titliyo ko apne pyar ke rang me daal deta tha.
ek din ek maali aya, aur us phool ko todne laga. us phool ko bahot dard hua, khoob roya, par maali ne kaha, wo use ek aur achhi jagah laga dega, jaha wo phool apne aapko Bhagwanji ke charno me paega. phool ne haste haste sare dukh seh liye. use maali ne Bhagwan ki moorti ke samne laga diya. thode din beet gaye. Bhagwanji ne us phool ko apaar, aseemit pyar diya, aur pavitra bana diya. Par wo phool, galti se, us patthar ko hi Bhagwan samajhne laga. Bhagwan ne use bahot samjhaya, har tarah se use dikhane ki koshish ki, ki jis patthar ko wo Bhagwan samajh raha hai, wo sirf ke sansarik vastu hai, Bhagwan to sarvyapi, sarvagya hain. wo is "physical" boundation se bahot upar hain. par ye baat phool ko samajh me aane me der ho gayi. us phool ko Bhagwan ke charno se hata diya gaya. ab uski jagah ek chattaan pe nishchit ho gayi. phool ne phirse apni jade basa li. phir se wo hara bhara ho gaya. par dheere dheere phool ko chattan se sneh hone laga. wo ye samajhne laga ki chattaan hi Bhagwan hai. itna taqatwar hai chattaan, ki koi use hara nahi sakta, koi use mita nahi sakta. use kya pata tha, ki is chattan se pyar karne ki saza me wo ek din, isi ke neeche dab ke mar jaega. ek din jab toofan aya, chattaan ke neeche ki zameen hil gayi. aur chattaan palat gayi. phool uske neeche dab ke mar gaya. apni antim saans tak jisko usne apna Bhagwan samjha, usne khud hi us phool ko maar diya.